Matan Ai
sesek tangkah, pipin tiangé belus
bli boya anak lanang ané
banget ajumang adi
sakéwala adi ané banget tresnain tiang
sekadi matan ai, nyunarang idup
ngaé anget ragan tiang
napi malih, rikala adi makenyem
tur ngusap sirah tiang
panyingakan adi ngranayang uyang
tusing taén ada ragu
ring ati, sekadi sunaran matan ai
ané percayang tiang
2025
Bungan Ati
ipianné dibi, wénten kupu-kupu
maencegan ngisep sari bungané
bunga warna-warni, ditu ring taman
pasliwer taler nyawan-nyawan
pada girang macanda
malinder makeber ring sakancan bungané
bunga-bungané liang
saling kedékin
kéto masih sané nyingakin
sareng marasa liang
olih ia bungan ati titang
2025
Nganyudang Rasa Sebet
ngeling tuah ngeling
mresidang tuah ngulungang yéh mata
sing suwud-suwud belus pipin
sampun suwé, semeng kaganti peteng
kanti peteng mawali malih semen
déwék titiang pedidian di petengé jani
kesiran angin dingi
niman kulit kasar ené
sayong sampun tuwun
nundunin lamunan
ngricik munyin yéh tukadé
magending sarwa jangkrik,
buin bedik gén tiang macebur
ditu uling duwur jembatané
2025
____
Indik Pangawi
Wayan Ésa Bhaskara, pangawi Bali sané jenek ring Tabanan. Sarahina ngamargiang ayah-ayahan dados guru. Ngripta makudang-kudang kakawian, sakadi ésai miwah puisi. Buku pupulan puisi Bali anyar dané sané pinih anyar mamurda Pasisi, Lawar, lan Saké (Pustaka Ékspresi, 2023).
