Gubernur Maca Koran
sepiné mangmung, semengné ento,
dugas maca koran,
tiang ningalin makudang-kudang orti
sané ngranayang yéh peningalané makebyos;
kapal terbang buatan Italiané ulung ring bukit,
kurir pakét anyud ring tukad,
blabar ring makudang-kudang genah,
tanah longsor sangkaning sabeh bales,
miwah kacilakaan ring margi
napiké gubernur iragané maosang orti punika?
napi sane kalaksanayang salanturnyané?
nginem kopi sané kacampur antuk arak
minab sampun prasida ngrahayuang ipun akidik,
utawi ngawinang ipun ngrikik
ngigelang topéng
2025
Beh Blabar
paksiné nguci
ujan angin, angin nglinus
yeh menék kanti matan batis,
sarwa buron tukad anyud kambang
kélangan umah
ratu batara, icén titiang kateguhan ati
punyan kayu bah,
rab umahé makeber punyah,
yéh ujan tusing suwud-suwud ulung ngandéng ring natah
ngandéng ring tlabah,
ngandéng ring trotoar marginé
taler sekancan luu milu mapalu
abuku, limang buku gedebong biu nglangi kanti bucu
béh buin blabar,
ideh-ideh punyan kayu pungkat,
marginé milu pegat, buin bedik gén sekarat!
2025
Mabinayan Wangsa
dados tiang malih masemaya driki?
tiang taler sanget tresna asih ajak Putu,
tusing ngitungang mabina wangsa,
tusing nyidayang mapalasan
yadiastun ujan krébék ngalih meriki
napi malih mangkin jagat modéren
sané mawasta globalisasi
sami dados émansipasi
Sang Semara Ratih pinaka saksi
niki boya duk jaman kerajaan
iraga sareng kalih sampun masemaya,
ngiket, nunggilang, nyikiang tresnané
mangda langgeng kayang kawekas,
natakin panes tis dini di mrecapada
sangkaning iraga ajak dadua mula tresna sujati,
nénten kapisahang,
yadiastun mabinayan wangsa
2025
____
Indik Pangawi
Wayan Ésa Bhaskara, pangawi Bali sané jenek ring Tabanan. Sarahina ngamargiang ayah-ayahan dados guru. Ngripta makudang-kudang kakawian, sakadi ésai miwah puisi. Buku pupulan puisi Bali anyar dané sané pinih anyar mamurda Pasisi, Lawar, lan Saké (Pustaka Ékspresi, 2023).
