Makurung
Patapan karma ngrengkeng
Batu magulik pagluluk peteng-peteng
Gagodan nungkalik ngentasin tuwuh
Manah mapunduh lekad mabekel tuyuh
Peluh matah pinunas abot pangapti ning
Canang sari katur makidung kingking
Ngoda déwék ngigel ngandong dosa
Pangkah ngetut pamargin Sang Arjuna
Tumedun paica masambeh manah linglung
____
Indik Pangawi
Nengah Jati, pangawi Bali sané saking Undisan, Bangli. Sampun akeh ngripta puisi Bali. Makudang-kudang puisi dané dados jayanti ring swayembara sastra. Tahun 2018 ngembasang buku pupulan puisi Bali anyar mamurda Silunglung (Pustaka Ekspresi)
