/1/
Ratu sané tedun saking lawangané,
masanggul bungan gandaraja.
Masumpang karawira ring kanawan,
tumuli Ratu makenyung.
Kenyungan Ratu sané manis punika,
Mangentenin sarwa prani.
/2/
Mangawatara mangaksi kawéntenan panjak.
I Ratu sané ngaksi ngraksa palemahan jagat.
Tan wénten kirang salantang yuga,
rasa sasih kinasih ring sakatah jiwi.
I Ratu sané miara sakancan sané mijil.
Sané dumun, mangkin tur sané pacang rauh.
/3/
I Ratu sané cokornyané kanin,
sangkaning rasa kasih ngasihin sané maprani.
Rah I Ratuné manyuti rupa dados tukad suluk,
ngwangsuhin sakancan mala.
Toya susu sané medal saking payodharan I Ratu.
Manyuti rupa dados woh-wohan, pantun,
tarosada sarwa tumuwuh maka sakaning kauripan.
/4/
Rasa kasih I Ratu,
ring sakancan prana-prani.
Ratu sané manyuti rupa dados Lembu
Kamadhuk, nagingin sakancan pinunas.
Okan I Ratuné makasami.
/5/
Punika wantah yasa kértin I Ratu,
mangda dharmané pageh ring jagaté.
I Ratu sané kasungsung pinaka Ibuning Ibu.
Sané ngempu para jiwatmanné.
/6/
Bhukti yasa kértin I Ratu
Bhakti pinaka dasar
Mukti sarwa praniné maka tetujon utama
/7/
Pangaksian I Ratu ngawinang tresna
Carman I Ratuné nutdutin manah
Ring dija ja I Ratu malampah,
irika entik-entikanné nglanus.
/8/
Ring dija ja I Ratu malampah,
irika pawanané alon ngasirsir.
Ring dija ja Ratu malampah,
irika sekar-sekaré pada kembang.
/9/
Ring dija ja I Ratu malampah,
irika para nyawan maduné ngruruh sari.
Ring dija ja Ratu malampah.
Irika toyané mumbul.
/10/
Ring dija ja I Ratu malampah,
irika ujanné sabeh nyombéhang merta.
Suaran tatité wantah grégélan kantan I Ratuné.
/11/
Téjan surya ri kala enjing
Téjan candra ri kala ratri
Punika wantah gelungan I Ratu
/12/
I Ratu satmaka jiwatmané paripurna
Marimurnayang angga sarira
/13/
I Ratu satmaka aksara-aksara
Sané matéja maring angga sarira
/14/
I Ratu satmaka Hyang Wéda Catur
Kasinungsung brahmana putus
/15/
I Ratu satmaka pangawit angkihanné
Taler panguntat angkihanné
/16/
I Ratu satmaka geni madianing pakundan
Taler geni ring pabasmian
/17/
I Ratu satmaka yadnyané utama
Mapinda mantra tantra upacara
/16/
I Ratu satmaka suksman panyumpenanné
Taler I Ratu satmaka entenné
/17/
I Ratu wantah cacirén ring sapasira sané sampun matangi
Taler I Ratu wantah cacirén ring sapasira sané kantun kapetengan
/18/
Ratu maraga guru-guru utama
Ratu maraga para déwata sané luih
Ratu marah sekar-sekar sané merik
Ri kalaning masa rasminé
Ratu maraga toyané ning ring telagané
/19/
Ratu maraga unteng sarining I bungan tunjung
Ratu maraga nyawané sané nganggit sarining puspa rum
Ratu maraga rumrumning I gandaraja
Ratu maraga abraning bang I karawira
Ratu maraga entéran baskaranné kala énjing
/20/
Ratu sané makta langkap Gandéwa Mahosiddhi
Maimbuh panah Pasupata
Mralina gulem kawimudané
/21/
Puniki I Mudha antuk bebaktaan akedik
maksa mamanah ngiket wewangunan
Kanggén genah ngalinggihang
prabhawan I Ratu sané maraga luih
Marupa gedong bebaturan kruna-kruna
/22/
Malawangan puja stuti,
mapinda gitaning rum.
Ledang ké Ratu ring aturan I Mudha nista,
aturan marupa toya wangsuh lan kakurah.
Toyané nyiprat saking cokor I Ratu.
/23/
Wantah tirta panyupaténg mala,
tan bina tirta sugih waras.
Mangda prasida ja sirahé puniki,
mapadu ring buk cokor I Ratu.
Nyadia polon titiangé kanggén Ratu tandalan.
/24/
Masarana antuk sekar tunjung tri datu
Mogi Ratu lédang,
ngamedalang ririsning aji.
Ririsning kamadhuk.
Lalita Karawira, Bhramara Sundarī Déwata Sasi
(Purnama Kartika)
