“Duh…
Cening ajak makejang.
Tinggalin baan paningalanné ceningé.
Yén jati-jati ané matutang?
Kanti bani nebek tangkah.
Kanti bani ngubek basing.”
“Duh…
Bilang wai Mémé nyakitang tangkah.
Marasa panes maborbor.
Bilang wai Mémé dekah-dekah
Ulian cening corah.”
“Duh…
Duratmaka pantes kena pangluh!
Tolih ja panyamanné makejang.
Kemu-mai ngalih umah
Ada masi ané mati
Ada masi ané tadah cening.”
“Duh…
Sungkan Méméné sakayang-kayang.
Tuara ada ubad.
Sajawaning api di tengah basang Méméné.
Ngeseng cening ajak makejang.”
Lalita Karawira, Bhramara Sundarī Déwata Śaśi
(Tilem Katiga)
Kipekan Mata Barong
Urip tan péndah buka kipekan matan barong. Akijapan bagia akijapan duka. Jani luhung buin mani bisa jelé. Jani mudah buin mani mael. Yéning dadi baan ngorahang teked pajalan ainé buka akijapan.
Pajalan sasih, pajalan warsa, kadirasa kipekan matan barong. Buka barong masolah di tengahing kalangan. Nelik kipak-kipek buka unduk iragané ajak makejang. Ané setata ngulik-ngulik pajalan guminé. Di kénkénné bisa tandruh.
Bangli, Desember 2024
