Om Awighamastu!
Swasti warsa 2026! Dumugi pidabdab sané mautama medal saking dik-widik.
Ngawit Januari 2026, Bali Politika ngaturang kolom sastra Bali “Ripta” ring krama sami sané seneng ngripta tur ngwacén sastra mabasa Bali. Kolom-kolom puniki kaptiang sida kanggén nglestariang tur nglimbakang basa miwah sastra Bali ring kahanan jagat digital sané sayan nglimbak.
Rédaksi nerima reriptan marupa puisi Bali anyar, carita cutet (cerpén), satua (tradisi lisan), utawi esai mabasa Bali (catatan perjalanan, resensi buku, utawi opini). Reriptan ida dané sida kakirim ring émail [email protected].
Reriptan sané ngranjing ring émail rédaksi pacang kakurasi, tur katerbitang online ring Balipolitika.com kirang langkung awuku saking karya kakirim/kakonfirmasi terbit. Nénten wénten biaya pengiriman karya, sakéwanten lédangang pisan, rédaksi durung sida ngaturin ida dané honor nulis. Pradé benjangan wénten pamargi, rédaksi mataki-taki nerbitang karya-karya duwé ring buku antologi puisi/cerpén terpilih awarsa apisan.
Wantah asapunika atur titiang, lédangang ring basa basita. Ngiring duwénang sareng-sareng kolom-kolom puniki.
Suksma dahat.
Denpasar, Januari 2026
Rédaksi Ripta Bali Politika
