NI Dangin teken Ni Nyangklong, “Dadong Sréo bisa ngaléak.”
I Pegeg tekén Luh Bélong, “I Lutir nitip pis satu juta, baang I Kejés, apang ada anggona meli bé céléng, basa-basa, busung, luluh saté, buah, bunga, sisané anggon bekel.”
Ni Nyangklong tekén I Ceking, “Dadong Sréo bisa ngaleak, cucuné dadianga caru.”
Luh Bélong tekén I Cubling, “I Lutir nitip pis 900 tali, baang I Kejés, apang ada anggona meli bé céléng, basa-basa, busung, luluh saté, buah, bunga.”
I Ceking tekén Ni Damuh, “Dadong Sréo bisa ngaléak, cucuné dadianga caru, mantuna cetika kanti mati.”
I Cubling tekén Ni Rinten, “I Lutir nitip pis 850 tali, baang I Kejés, apang ada anggona meli bé céléng, basa-basa, busung, luluh saté, buah.”
Ni Damuh tekén Man Dauh, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné.”
Ni Rinten tekén Kak Cekog, “I Lutir nitip pis 725 tali, baang I Kejés, apang ada anggona meli bé céléng, basa-basa, busung, luluh saté.”
Man Dauh tekén I Kecig, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah.”
Kak Cekog tekén Pan Dira, “I Lutir nitip pis 500 tali, baang I Kejés, apang ada anggona meli bé céléng, basa-basa, busung.”
I Kecig tekén I Polag, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné.”
Pan Dira tekén I Déngkék, “I Lutir nitip pis 450 tali, baang I Kejés, apang ada anggona meli bé céléng, basa-basa.”
I Polag tekén Rumpianis, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné. Bin maniné, punyan nyambu di baledan tegalné geseng.”
I Déngkék tekén I Rupig, “I Lutir nitip pis 300 tali, baang I Kejés, apang ada anggona meli bé céléng, basa-basa.”
Rumpianis tekén I Degeng, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné. Bin maniné, punyan nyambu di baledan tegalné geseng. Sandingané tan mua ngutahang getih.”
I Rupig tekén Dadong Coglok, “I Lutir nitip pis 220 tali, baang I Kejés, apang ada anggona meli bé céléng.”
I Degeng tekén Ngah Lempéd, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné. Bin maniné, punyan nyambu di baledan tegalné geseng. Sandingané tan mua ngutahang getih. Untung ada balian sakti ané nulungin, yén sing kéto bisa-bisa mati sandingané.”
Dadong Coglok tekén I Catri, “I Lutir nitip pis 150 tali, baang I Kejés, apang ada anggona meli bé céléng.”
Ngah Lempéd tekén Dadong Mungkreg, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné. Bin maniné, punyan nyambu di baledan tegalné geseng. Sandingané tan mua ngutahang getih. Untung ada balian sakti ané nulungin, yén sing kéto bisa-bisa mati sandingané. Ada koné taén nepukin Dadong Sréo dadi léak ngalédlédang layah masadah di punyan nangkané, layahné lantang ngetélang poos marupa api.”
I Catri tekén Nang Puger, “I Lutir nitip pis 100 tali, baang I Kejés, apang ada anggona meli bé céléng.”
Dadong Mungkreg tekén I Langkir, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné. Bin maniné, punyan nyambu di baledan tegalné geseng. Sandingané tan mua ngutahang getih. Untung ada balian sakti ané nulungin, yén sing kéto bisa-bisa mati sandingané. Ada koné taén nepukin Dadong Sréo dadi léak ngalédlédang layah masadah di punyan nangkané, layahne lantang ngetélang poos marupa api. Anaké ané nepukin langsung katinjot, maniné gelem sing nyidaang bangun. Kanti aminggu mara seger.”
Nang Puger teken I Kejes, “Ada titipan pis 50 tali uli I Lutir, apang ada koné anggon bekel.”
I Langkir teken Tut Peos, “Dadong Sréo bisa ngaléak, cucuné dadianga caru, mantuna cetika kanti mati. Dugas Kajeng Kliwoné dangklang-déngkléng di natahné, nganggon kamben di duur entud, ngalédlédang layah. Kuluké nyalung-nyalung, saget api makeber di duur umahné. Bin maniné, punyan nyambu di baledan tegalné geseng. Sandingané tan mua ngutahang getih. Untung ada balian sakti ané nulungin, yén sing kéto bisa-bisa mati sandingané. Ada koné taén nepukin Dadong Sréo dadi léak ngalédlédang layah masadah di punyan nangkané, layahne lantang ngetélang poos marupa api. Anaké ané nepukin langsung katinjot, maniné gelem sing nyidaang bangun. Kanti aminggu mara seger. Uli wanén jani anaké ento dadi getap.”
I Kejés tekén I Lutir, “Suksma titipané. Ada anggon bekel.”
Man Péos tekén Dadong Sréo: Seken dadong bisa ngaléak? I Langkir ngoraang kéto.
I Lutir anggut-anggut.
Bin maniné semengan Man Péos ngutah mising, sanjané tegena tekén krama dadiané abana ka sétra.
____
Indik Pangawi
Putu Supartika embas ring Selumbung, Manggis, Karangasem warsa 1994. Dane silih tunggil pangawi sastra Bali anyar sané produktif. Sampun ngembasang makudang-kudang buku sastra Bali anyar. Lianan ngripta sastra Bali anyar, dane mangkin aktif dados jurnalis, sapisanan ngreamba majalah sastra digital mabasa Bali, Suara Saking Bali.
